घोडेगाव-आंबेगाव तालुका विद्या विकास मंडळ संचलित न्यू इंग्लिश मिडीयम स्कूल, घोडेगाव येथे आंतरराष्ट्रीय योग दिन मोठ्या उत्साहात आणि चैतन्यमय वातावरणात साजरा करण्यात आला. या निमित्ताने विद्यालयातील विद्यार्थ्यांनी आणि शिक्षकांनी उत्स्फूर्तपणे योगासनांची प्रात्यक्षिके केली.
स्वराज्य संवाद – घोडेगाव प्रतिनिधी
कार्यक्रमाच्या सुरुवातीला क्रीडा शिक्षिका ज्योती रोकडे यांच्या उत्कृष्ट मार्गदर्शनाखाली विद्यार्थ्यांनी विविध योगासने आणि प्राणायामाची प्रात्यक्षिके सादर केली. यामध्ये विद्यालयाच्या शिक्षकांनीही सक्रिय सहभाग नोंदवला.
याप्रसंगी आंबेगाव तालुका विद्या विकास मंडळाचे पदाधिकारी व मान्यवरांनी उपस्थित राहून विद्यार्थ्यांना मौल्यवान मार्गदर्शन केले. संस्थेचे अध्यक्ष मा.श्री. तुकाराम काळे, उपाध्यक्ष मा.श्री. संजय आर्वीकर, कार्याध्यक्ष श्री. सुरेशशेठ काळे, सचिव श्री. विश्वास काळे, चेअरमन श्री. बाळासाहेब काळे, खजिनदार श्री. सोमनाथ काळे, समन्वय समिती चेअरमन श्री. राजेश काळे, तसेच संचालक मा.श्री. अजित काळे व श्री. अक्षय काळे यांनी विद्यार्थ्यांना योगसाधनेचे महत्त्व पटवून देत नियमित सराव करण्याचा सल्ला दिला.
मान्यवरांचे मार्गदर्शन
श्री. आर्वीकर सर – आपले शरीर अमूल्य असून त्याचे व्यवस्थित संचालन होण्यासाठी योग आवश्यक आहे. विद्यार्थ्यांनी केवळ आजच्या दिवसापुरते मर्यादित न राहता दररोज योगासने करावीत.
प्राचार्या मेरीफ्लोरा डिसोजा – मानवी जीवनात योगाचे स्थान अत्यंत महत्त्वाचे असून नियमित योगसाधनेमुळे मानसिक व शारीरिक आरोग्य सुदृढ राहते.
उपप्राचार्या रेखा आवारी – दैनंदिन जीवनात व्यायामासोबतच सकस आणि संतुलित आहाराचे महत्त्व अनन्यसाधारण आहे.
कार्यक्रमाचे संयोजन
विद्यालयाच्या शिक्षिका सौ. स्वाती शेटे यांनी कार्यक्रमाचे अत्यंत नेटके सूत्रसंचालन केले. सौ. रश्मी गाडिलकर यांनी उपस्थितांना योग संकल्पनेविषयी सविस्तर माहिती सांगितली. कार्यक्रमाच्या शेवटी श्रीमती अमिता चासकर यांनी सर्व मान्यवर, शिक्षक आणि विद्यार्थ्यांचे आभार मानले.
हा कार्यक्रम यशस्वी करण्यासाठी विद्यालयाच्या प्राचार्या श्रीमती मेरीफ्लोरा डिसोजा, उपप्राचार्या श्रीमती रेखा आवारी, पर्यवेक्षिका श्रीमती वंदना वायकर यांचे विशेष मार्गदर्शन लाभले. तसेच क्रीडा शिक्षक देवा सर, श्री. कैलास जाधव, गणेश मडके, तरणूम शेख, विक्रम कोकणे, श्रावणी गाडेकर यांच्यासह सर्व शिक्षक व शिक्षकेतर कर्मचाऱ्यांनी विशेष परिश्रम घेत मोलाचे सहकार्य केले.
