अमली पदार्थांचे सेवन मानवी शरीरास अत्यंत हानिकारक असून, तरुण पिढीने अशा घातक व्यसनांपासून दूर राहणे गरजेचे आहे, हाच संदेश देत घोडेगाव येथे ‘अमली पदार्थ विरोधी दिना’निमित्त शाळकरी विद्यार्थ्यांनी भव्य प्रभात फेरी काढली. आंबेगाव तालुका विद्या विकास मंडळ संचलित, न्यू इंग्लिश मीडियम स्कूलमधील स्काऊट आणि गाईडच्या विद्यार्थ्यांनी या जनजागृती अभियानात उत्स्फूर्त सहभाग नोंदवला.
घोषणांनी दुमदुमला परिसर
क्रीडा शिक्षिका ज्योती रोकडे यांच्या मार्गदर्शनाखाली इयत्ता ८ वीच्या विद्यार्थ्यांच्या पथकाने घोडेगाव शहराच्या मुख्य बाजारपेठ आणि प्रमुख मार्गांवरून प्रभात फेरी काढली. या वेळी विद्यार्थ्यांनी हातामध्ये अमली पदार्थांच्या दुष्परिणामांचे फलक धरले होते. “व्यसन नको, आरोग्य हवे”, “अमली पदार्थ टाळा, आयुष्य वाचवा” अशा विविध घोषणा देत विद्यार्थ्यांनी संपूर्ण परिसराचे लक्ष वेधून घेतले.
शिक्षक व प्रशासनाचा सहभाग
विद्यार्थ्यांच्या या जनजागृती मोहिमेत शाळेतील शिक्षकांनीही मोठ्या संख्येने सहभाग घेतला. यामध्ये क्रीडा शिक्षक देवा सर, सौ. रश्मी गाडीलकर, श्री. कैलास जाधव सर, सौ. स्वाती शेटे आणि गणेश मडके यांनी प्रत्यक्ष फेरीत सामील होऊन विद्यार्थ्यांचा उत्साह वाढवला. तसेच शाळेच्या प्राचार्या मेरी फ्लोरा डिसूझा, उपप्राचार्या रेखा आवारी आणि पर्यवेक्षिका वंदना वायकर यांनी विद्यार्थ्यांना व्यसनमुक्तीचे महत्त्व पटवून देत मोलाचे मार्गदर्शन केले.
विद्यार्थ्यांनी सामाजिक भान ठेवून राबवलेल्या या स्तुत्य उपक्रमाचे सर्व स्तरांतून कौतुक होत आहे. आंबेगाव तालुका विद्या विकास मंडळाचे अध्यक्ष श्री. तुकाराम काळे, उपाध्यक्ष ॲड. संजय आर्वीकर, कार्याध्यक्ष श्री. शेठ काळे, संस्थेचे सचिव श्री. विश्वासराव काळे, खजिनदार श्री. सोमनाथ काळे आणि विद्यालयाचे चेअरमन श्री. बाळासाहेब काळे यांनी विद्यार्थ्यांचे व मार्गदर्शक शिक्षकांचे विशेष अभिनंदन केले. या प्रभात फेरीमुळे घोडेगाव परिसरात अमली पदार्थांच्या विरोधात एक सकारात्मक संदेश गेल्याची भावना नागरिकांनी व्यक्त केली.
