आंबेगाव तालुक्यातील वडगाव काशिंबेग येथे एका नामांकित इलेक्ट्रिक सप्लायर्स कंपनीचे साहित्य अज्ञात चोरांनी लांबवल्याची घटना उघडकीस आली आहे. मोकळ्या जागेत ठेवलेल्या एकूण २३ ड्रमपैकी दीड लाख रुपये किमतीचा १ इलेक्ट्रिक ॲल्युमिनियम कंडक्टर ड्रम चोरीला गेला आहे. याप्रणाली कंपनीचे जनरल मॅनेजर पंकज कृष्णराव मोरे रा. धायरी, पुणे यांनी मंचर पोलीस ठाण्यात फिर्याद दिली आहे.
प्रतिनिधी – विश्वजित गवारी
घटनाक्रम आणि पार्श्वभूमी
मिळालेल्या माहितीनुसार फिर्यादी पंकज मोरे हे ‘आराकान इलेक्ट्रिक सप्लायर्स’ कंपनीत जनरल मॅनेजर म्हणून कार्यरत आहेत. त्यांच्या कंपनीने वडगाव काशिंबेग ते पेठ गावची ११ केव्ही (11 KV) सोलर इलेक्ट्रिक लाईनचे काम घेतले आहे. या कामासाठी लागणारे इलेक्ट्रिक ॲल्युमिनियम कंडक्टरचे ड्रम वडगाव काशिंबेग येथील मोरया मंगल कार्यालयासमोरील मोकळ्या जागेत सुरक्षेसाठी ठेवण्यात आले होते. वेगवेगळ्या तारखांना मिळून या ठिकाणी एकूण २५ ड्रम उतरवून घेण्यात आले होते, त्यापैकी २ ड्रम इतर साईटवर नेण्यात आल्यामुळे घटनास्थळी २३ ड्रम शिल्लक होते.
अशी झाली चोरी
दिनांक २७ मे २०२६ रोजी दुपारी १२:४९ वाजल्यापासून ते ४ जुलै २०२६ रोजी सकाळी ०९:२९ वाजेच्या दरम्यानच्या कालावधीत ही चोरी झाली. फिर्यादी मोरे हे जेव्हा कामगारांसह ड्रम पाहणीसाठी गेले, तेव्हा त्यांना २३ पैकी २२ ड्रम जागेवर दिसले. या ठिकाणी वॉचमन नसल्याचा फायदा घेत अज्ञात चोराने १,५०,०००/- रुपये किमतीचा २.७०० किमी लांबी असलेला ड्रम फिर्यादीच्या संमतीशिवाय लबाडीच्या इराद्याने चोरून नेल्याचे निष्पन्न झाले. कंपनीचे अधिकारी आणि सब-कॉन्ट्रॅक्टर यांच्याकडे आजूबाजूला चौकशी करूनही काही पत्ता न लागल्याने अखेर पोलिसांत धाव घेण्यात आली.
पोलीस कारवाई
या तक्रारीवरून मंचर पोलिसांनी अज्ञात आरोपीविरुद्ध भारतीय न्याय संहिता (BNS), २०२३ च्या कलम ३०३(२) अन्वये चोरीचा गुन्हा दाखल केला आहे. पोलीस निरीक्षक यांच्या मार्गदर्शनाखाली पोलीस हवालदार शेखर भोईर या प्रकरणाचा पुढील तपास करत आहेत.
