भैरवनाथ नागरी सहकारी पतसंस्थेच्या ‘व्हिजन २०३२’ अंतर्गत संस्थेचे संस्थापक अध्यक्ष शिवाजीराव आढळराव पाटील यांच्या प्रमुख उपस्थितीत सर्व कर्मचारी वर्ग व संचालक मंडळाची दोन दिवसीय विशेष कार्यशाळा शिवसंकुल, लांडेवाडी येथे उत्साहपूर्ण वातावरणात पार पडली. स्कूल ऑफ इन्स्पायरेशनल लीडरशिप (SIL) यांच्या मार्गदर्शनाखाली आयोजित करण्यात आलेल्या या कार्यशाळेत संस्थेच्या भविष्यातील वाटचालीसंदर्भात सखोल विचारमंथन करण्यात आले. बदलत्या आर्थिक व तंत्रज्ञानाच्या युगात संस्थेची उलाढाल नजीकच्या भविष्यकाळात तीन ते साडेतीन हजार कोटींच्या पुढे नेण्याचा मानस यावेळी संस्थापक अध्यक्ष शिवाजीराव आढळराव पाटील यांनी व्यक्त केला.
प्रतिनिधी – दिपाली खिरड
‘व्हिजन २०३२’ चे प्रमुख लक्ष्य निश्चित
या दोन दिवसीय विशेष कार्यशाळेत ‘व्हिजन २०३२’ अंतर्गत संस्थेला आर्थिकदृष्ट्या अधिक सक्षम, आधुनिक, तंत्रज्ञानाधिष्ठित आणि सभासदाभिमुख वित्तीय संस्था म्हणून विकसित करण्याचे लक्ष्य निश्चित करण्यात आले आहे. बदलत्या आर्थिक परिस्थितीतील संधींचा योग्य वापर करून संस्थेची एकूण कार्यक्षमता, नफा, आर्थिक स्थैर्य आणि सामाजिक बांधिलकी अधिक मजबूत करणे, हे या व्हिजनचे प्रमुख उद्दिष्ट असणार आहे.
नियोजनबद्ध विस्तार आणि डिजिटल बँकिंगवर भर
संस्थेच्या पुढील दशकातील वाटचालीचा रोडमॅप तयार करताना खालील प्रमुख सूत्रांवर विशेष भर देण्याचा संकल्प करण्यात आला
- व्यवसायाचा विस्तार: संस्थेच्या व्यवसायाचा नियोजनबद्ध विस्तार करणे.
- ठेवी व कर्ज वाढ: ठेवी आणि कर्ज व्यवसायामध्ये भरीव व शाश्वत वाढ करणे.
- डिजिटल बँकिंग: बदलत्या काळानुसार डिजिटल बँकिंग आणि आधुनिक तंत्रज्ञानाचा प्रभावी वापर करणे.
- उत्कृष्ट ग्राहकसेवा: सभासदांना चौकट उत्कृष्ट आणि जलद ग्राहकसेवा देणे.
- सक्षम मनुष्यबळ: कर्मचाऱ्यांच्या कौशल्यविकासातून सक्षम मनुष्यबळ निर्माण करणे.
- पारदर्शकता: संस्थेची कार्यपद्धती अधिक पारदर्शक आणि विश्वासार्ह ठेवणे.
संधींचा स्वीकार करून पारदर्शक कारभार करा: शिवाजीराव आढळराव पाटील
संस्थेचे संस्थापक अध्यक्ष शिवाजीराव आढळराव पाटील यांनी कर्मचाऱ्यांना मार्गदर्शन करताना सांगितले की, बदलत्या आर्थिक व तंत्रज्ञानाच्या युगात संस्थेने नव्या संधींचा स्वीकार केला पाहिजे. अधिक सक्षम, पारदर्शक आणि विश्वासार्ह वित्तीय संस्था म्हणून पुढे जाण्याची गरज त्यांनी व्यक्त केली. तसेच, संस्थेची उलाढाल साडेतीन हजार कोटींच्या पुढे नेण्यासाठी सर्वांनी कटिबद्ध राहण्याचे आवाहन त्यांनी केले. “संस्थेची प्रगती ही प्रत्येक कर्मचारी, अधिकारी, संचालक आणि सभासदाच्या सहभागातूनच शक्य आहे”, हा विचार या कार्यशाळेत अधोरेखित करण्यात आला.
भविष्यकालीन वाटचालीची भूमिका
कार्यक्रमाच्या सुरुवातीला संस्थेचे उपाध्यक्ष सागर काजळे यांनी प्रास्ताविकात संस्थेच्या कामकाजाचा सविस्तर आढावा घेतला. त्यांनी भविष्यकालीन वाटचालीची भूमिका विषद करतानाच, कर्मचारी वर्गाने आपली व्यावसायिक क्षमता विकसित करण्याचे आवाहन केले. या कार्यशाळेमुळे कर्मचारी वर्ग आणि संचालक मंडळामध्ये नवचैतन्य निर्माण झाले असून आगामी वाटचालीसाठी नवीन ऊर्जा, स्पष्ट दिशा आणि एकजुटीची भावना निर्माण झाली आहे.
मान्यवरांची उपस्थिती
या विशेष कार्यशाळेप्रसंगी डायनालॉग इंडियाचे कार्यकारी संचालक अक्षय आढळराव पाटील, एस आय एल (SIL) संस्थेचे संचालक डॉ. योगेश पवार, सतिश नायर, मानसी प्रभुदेसाई, काजल मालापुडी, उत्कर्ष जुनेजा व त्यांचे सहकारी उपस्थित होते.
तसेच भैरवनाथ पतसंस्थेच्या संचालिका सौ. कल्पना आढळराव पाटील, संचालक महेश ढमढेरे, हनुमंत तागड, अभिमन्यू लांडगे, सौ. शोभा आवटे, सौ. अंजली थोरात, उपमुख्य कार्यकारी अधिकारी रमेश खरमाळे यांच्यासह संस्थेचे सर्व शाखाधिकारी व कर्मचारी वर्ग मोठ्या संख्येने उपस्थित होता.
